ក្រែមជម្រុះរោម
ក្រែមឬជែលជម្រុះនេះ គឺជម្រុះរោមបានភ្លាម គ្រាន់តែយើងលាបទៅលើស្បែក ទុកប៉ុន្មាននាទី ហើយជូតចេញ រោមនឹងដាច់ជ្រុះមក។ វិធីនេះគឺដូចកោរអ៊ីចឹង វាដាច់ត្រឹមផ្នែកខាងលើប៉ុណ្ណោះ ដែលវាងាយនឹងដុះឡើងវិញ។ ក្រែមប្រភេទនេះ បើអ្នកទាំងអស់គ្នា ចង់ប្រើសម្រាប់ជម្រុះរោមនៅលើមុខ គឺត្រូវច្បាស់ថាវាអាចប្រើសម្រាប់មុខបាន ព្រោះវាមានសារធាតុខ្លាំងដែលនាំឱ្យប៉ះពាល់ដល់ស្បែកមុខ។
កោររោម
វិធីនេះគឺដូចក្រែមជម្រុះដែរ ព្រោះដាច់ត្រឹមផ្នែកខាងលើ ហើយដុះឡើងវិញលឿន ថែមទាំងអាចមានដុះរោមកប់ផងដែរ។
បក ឬដកជម្រុះរោម
បកឬដក គឺធ្វើឱ្យជ្រុះចេញដល់គល់ វាក៏អាចដុះរោមកប់មកវិញដូចគ្នា និងឡើងដុំពកបើសិនជាយើងមិនមើលថែ និងធ្វើតាមវិធីដែលត្រឹមត្រូវទេនោះ។
វិធីថែទាំស្បែកមុននិងក្រោយ ការបករោមត្រឹមត្រូវ ការពារដុះរោមកប់ និងឡើងដុំពក
ម៉ាស៊ីនដករោម
វីធីនេះគឺដូចនឹងការបក-ដកដែរ ព្រោះត្រូវដករោមចេញដោយទាំងគល់ តែវិធីនេះងាយស្រួល ដោយសារតែយើងប្រើម៉ាស៊ីន ហើយក៏វាមិនសូវឈឺខ្លាំងដូចបកដែរ។
ការបាញ់ឡាស៊ែ
ការបាញ់ឡាស៊ែគឺជាវិធីកម្ចាត់រោមរយៈពេលវែង។ វិធីនេះគោលបំណងកម្ចាត់ឱ្យដល់គល់រោម កម្ដៅខ្ពស់នៃឡាស៊ែមាននាទី បញ្ឈប់ការដុះរោមថ្មីឡើងវិញ។
ការបាញ់ឡាស៊ែជម្រុះរោមអាចធ្វើបានគ្រប់ទីកន្លែងនៃដងខ្លួន ចៀសវាងតែបរិវេណភ្នែក។ ការបាញ់ឡាស៊ែនេះដែរ គឺត្រូវការការធ្វើច្រើនដងទើបបានលទ្ធផលល្អ។
ការដុះឡើងវិញនៃរោម គឺអាស្រ័យទៅលើមនុស្សម្នាក់ៗ អ្នកខ្លះបានរាប់ខែ ហើយអ្នកខ្លះបានដល់រាប់ឆ្នាំ ឬបាត់ជារៀងរហូតតែម្ដង។ បើរោមនោះដុះឡើងវិញ គឺដុះមកតិចនិងស្មើងៗប៉ុណ្ណោះ។
ផលរំខានបន្ទាប់ធ្វើបាញ់ហើយ គឺអាចនឹងរលាកក្រហមនៅលើស្បែក តែវាបាត់ទៅវិញក្នុងរយៈពេល ២ ទៅ ៣ ម៉ោងប៉ុណ្ណោះ។ វិធីនេះសម្រាប់អ្នកមានស្បែកស្រអែមអាចនឹងបន្សល់ស្នាមអាចមន៍រុយ តែវានឹងបាត់ទៅវិញដូចគ្នា។
