មួយថ្ងៃកន្លងមួយថ្ងៃ រឿងខ្លះកើតឡើងដោយមិនបានរំពឹងទុក។ ជីវិតរវល់តែខំប្រឹងរកស៊ី រកលុយ និងធ្វើយ៉ាងម៉េចដើម្បីឱ្យខ្លួនឯងជោគជ័យ តែយើងបែរជាភ្លេចវេលាខ្លះៗ ក្នុងការសម្រាកមើលថែចិត្តខ្លួនឯងទៅវិញ។ បើរស់នៅរាល់ថ្ងៃពិបាកពេក គិតថាខ្លួនឯងកំពុងជាប់នៅមួយកន្លែង រកផ្លូវចេញមិនឃើញ អាចសាកត្រឡប់ក្រោយបន្តិច ហើយសួរខ្លួនឯង និងឱ្យពេលខ្លួនឯងបន្តិចបន្តួច តាមរយៈការធ្វើសម្មភាពខាងក្រោមនេះ៖
១. ធ្វើសមាធិរាល់ថ្ងៃ
មនុស្សជាច្រើន គ្រាន់លឺថាធ្វើសមាធិ ដឹងតែគិតថាជារឿងពិបាកតែម្ដង។ ការពិតការតាំងសមាធិ មិនពិបាកដូចដែលយើងគិតនោះទេ។ មិនមានន័យថាអ្នកត្រូវតែទៅចូលរួមកន្លែងរៀបចំការធ្វើសមាធិធំៗ ទើបអាចធ្វើសមាធិបាននោះទេ។ អ្វីដែលអ្នកត្រូវធ្វើគឺ រកកន្លែងស្ងាត់ អង្គុយឬក៏គេង បិទភ្នែក និងផ្តោតទៅលើការដកដង្ហើមរបស់អ្នកតែមួយមុខបានហើយ។ ឬក៏ចូលទៅមើលការបង្រៀនលំអិតក្នុង YouTube បន្ថែមទៀតក៏បានដែរ។ ព្យាយាមសមាធិ៥នាទីរាល់យប់ ដើម្បីឱ្យខ្លួនអ្នកបានសម្រាក និងខួរក្បាលបានធូរស្បើយពីភាពស្មុគស្មាញ។ អ្នកនឹងឃើញលទ្ធផលពិតប្រាកដមិនខាន ពេលធ្វើវាយូរៗទៅ និងជាទម្លាប់ផងដែរ។
២. រៀនធ្វើម្ហូប
ធ្វើម្ហូបញ៉ាំខ្លួនឯង មិនត្រឹមតែសល់លុយ តែក៏ផ្ដល់ផលប្រយោជន៍ដល់រាង្គកាយ និងសុខភាពផងដែរ។ បើប្រៀបធៀបជាមួយអាហារធ្វើខ្លួនឯង និងអាហារទិញពីក្រៅមក គឺអាហារក្រៅមានផលប៉ះពាល់ច្រើនជាង មិនទាំងបូកបញ្ចូលថាវាថ្លៃផង។ ធ្វើអាហារដែលងាយៗ និងអាហារសុខភាពសម្រាប់ខ្លួនឯង យ៉ាងហោចណាស់ឱ្យបានម្ដងក្នុងមួយថ្ងៃ។ B. Stylist ក៏មានមាតិកា រៀនធ្វើម្ហូប ដែរ អ្នកទាំងអស់គ្នាអាចសាកល្បង និងរៀនធ្វើញ៉ាំដោយខ្លួនឯង។
៣. ហាត់ប្រាណ រៀងរាល់ថ្ងៃ
រាង្គកាយរបស់មនុស្សត្រូវការការធ្វើចលនាជារៀងរាល់ថ្ងៃ។ ប៉ុន្តែអ្នកធ្វើការOfficeប្រហែលជាគ្មានពេល ឬក៏ធ្វើចលនាបានច្រើននោះទេ ដែលនាំឱ្យបង្កផលអាក្រក់ដល់ផ្នែកខ្លះនៃខ្លួនប្រាណ ដូចឈឺចង្កេះ ឈឺស្មា ឈឺកញ្ចឹងក ជាដើម។ បញ្ហាទាំងនេះ ងាយស្រួលដោះស្រាយទេ ដោយការធ្វើហាត់ប្រាណជាប្រចាំថ្ងៃ មុនចេញទៅធ្វើការ។ មិនចាំបាច់តែទៅកន្លែងហាត់ប្រាណ ឬមានគ្រូបង្វឹកអីទេ បើអ្នកគ្មានពេលអាចធ្វើចលនាងាយៗនៅផ្ទះបាន។
៤. អានមុនចូលគេង
បង្កើតទម្លាប់អានឱ្យបាន៥ទំព័រក្នុងមួយថ្ងៃ មុននឹងចូលគេង។ បើមើលទៅវាដូចជាមិនច្រើន តែបើអាចធ្វើបាន ចាប់ពី១ខែឬ២ខែ អ្នកអាចអានចប់មួយក្បាលក៏ថាបាន។ សៀវភៅអីក៏បានដែរ ឱ្យជាសៀវភៅដែលអ្នកចូលចិត្ត។ វាមិនត្រឹមតែជួយបន្ថយស្ត្រេស តែក៏អាចឱ្យអ្នករៀនសូត្របានពីវា និងបង្កើតចំណេះដឹង ថែមទាំងគំនិតថ្មីៗទៀតផង។ រឹតតែល្អ បើអ្នកសរសេរការយល់ឃើញរបស់អ្នកពីសៀវភៅ និងកត់ទុកត្រង់ណា ដែលអ្នកបានរៀននិងចាំ បន្ទាប់ពីអានហើយ។
៥. រឿងតូចតាចក៏សំខាន់
ត្រូវសប្បាយចិត្តនឹងអ្វីដែលយើងមាន ឬរឿងល្អក្នុងជីវិតយើង។ សរសេរ៣ចំណុច ដែលធ្វើ ឱ្យអ្នកសប្បាយចិត្ត ជារៀងរាល់យប់ មុនចូលគេង។ ជួបជុំមិត្តភក្តិបែបធម្មតាៗ សម្រាប់ការសមិទ្ធិផលតូចតាច ដែលបានធ្វើបានជោគជ័យ មិនថានៅសាលា ឬនៅកន្លែងធ្វើការ។
បើអ្នកគិតតែចំណុចវិជ្ជមាន អ្នកនឹងមិនខ្វះរឿងល្អក្នុងជីវិតនោះទេ។
